Факултети филологияи ӯзбек

Телефон барои маълумот

Дар партави сиёсати пешгирифтаи Ҳукумати Ҷумҳурии Тоҷикистон, таҳти сарварии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо иҷозати Вазорати маориф ва илми Ҷумҳурии Тоҷикистон таҳти рақами №01/1-1073 аз 29.10.2018 ҷиҳати густариши ҳамкориҳои судманди ду давлати ба ҳам дӯст - Тоҷикистону Ӯзбекистон бо ибтикор ва қарори Шӯрои олимони Муассисаи давлатии таълимии “Донишгоҳи давлатии Хуҷанд ба номи академик Бобоҷон Ғафуров” № 3 аз санаи 31-уми октябри соли 2018, инчунин бо фармоиши ректори МДТ «ДДХ ба номи академик Бобоҷон Ғафуров” №328 аз санаи 05.11.2018 факултети филологияи ӯзбек таъсис дода шуд. Факултет бо намуди таҳсили рӯзона ва ғоибона (фосилавӣ) ба фаъолият шуруъ намуд.

Аз санаи 05.11.2018 ба вазифаи декани факултет номзади илмҳои филологӣ, дотсент Турдибоев Тоҳир Ҳасанович таъин карда шуд.

Факултети мазкур бо потенсиали кадрӣ таъмин буда, ҳамчунин имкониятҳои зиёдеро ҷиҳати таълиму тарбияи донишҷӯён доро мебошад. Аз рӯи ихтисоси мазкур 2 нафар докторони илм, профессор ва 16 нафар номзадҳои илм, дотсентон дар пешрафти раванди таълим ва таҳкими сатҳу сифати таҳсилот нақши муассир мегузоранд. Дар факултет ду кафедра - “Забони ӯзбекӣ ва методикаи таълими он”, “Адабиёти ӯзбек ва методикаи таълими он” амал намуда, теъдоди донишҷӯёни он 238 нафарро (109 нафар рӯзона ва 129 нафар ғоибона) ташкил медиҳад.

Хотиррасон бояд намуд, ки дар таърихи беш аз 80-солаи донишгоҳ, соли 1991 факултети филологияи ӯзбек таъсис ёфта, дар соли 2011 фаъолияташ маҳдуд гардида буд, яъне то ин дам кафедраҳои собиқ факултети филологияи ӯзбек тобеи факултети забонҳои шарқи донишгоҳ буданд.

Айни замон, ҳамкории донишгоҳ бо муассисаҳои таҳсилоти олӣ ва миёнаи касбии ин кишвари ба ҳам дӯст густариш ёфта, танҳо соли 2018 панҷ созишномаи ҳамкории байналмилалӣ бо донишгоҳҳои давлатии Самарқанду Андиҷон ва Фарғонаи Ҷумҳурии Ӯзбекистон ба имзо расонида шуд, ки он минбаъд барои мустаҳкам намудани равобити илмию фарҳангӣ ва табодули таҷрибаи тарафайн заминаи мусоид фароҳам хоҳад овард.