Президентимизга раҳмат
Айрим гуруҳларнинг хориждан туриб, Тожикистонда инсон ҳуқуқларининг поймол этилаётганлиги тӯғрисида қилаётган даъволари асоссиздир.
Ривожланиш сари юз тутган ҳар қандай демократик жамиятда баъзи камчиликлар юз беради. Амму бу камчиликлар ва шу асосда йӯл қӯйиладиган хатоликлар ӯша хатонинг атайлаб қилинганлигидан далолат бермайди.
Айрим ӯз нафсининг қурбонига айланган кимсаларнинг баъзи одамларнинг ӯз ҳуқуқини яхши билмаслигидан фойдаланиб, қонунга зид равишда иш юритишларини кузатиш мумкин. Улар Ҳукуматнинг чиқарган қонунларини четлаб ӯтиб, ӯз мақсадларига, яъни мӯмай даромадни қӯлга киритишга ҳаракат қиладилар. Табиийки, жабрдийданинг дахлдор органларга шикоят қилмаганлиги оқибатида шу каби айрим нопок ишлар ва уларни амалга оширган нопок шахсларнинг қилмишлари очилмасдан қолиб кетаверади ҳамда содда одамларда жамиятда адолат йӯқ экан деган хулосага олиб келади.
Агар барча баравар Ҳукумат томонидан чиқарилган қонун ва қоидаларга амал қилса, жамиятда инсон ҳуқуқларининг поймол этилаётганлигига доир сӯз ҳам чиқмайди.
Фикримиз исботи учун бир аёлнинг бошидан кечирганларини қисқача тарзда келтиришини лозим топдик.
“Мен эримдан ажрашганимдан сӯнг фарзандларим мен билан қолишига ҳаракат қилдим. Фарзандларим ҳам шуни хоҳларди. Зеро, қонун юзасидан ҳам шундай бӯлиши лозим эди. Аммо суд фарзандларимни отаси билан қолиши тӯғрисида қарор чиқарди. Мен бундан ҳайрон бӯлиб, судянинг олдига кирдим. Зору тавалло қилдим. Аммо у мени эшитишни ҳам истамади. Бу ҳам етмаганидек, менинг устимдан кулиб, масхара қилди. Шундагина эримнинг мен шу вақтгача ишонмаган “Менинг қӯлимда жарақ-жарақ пулим бор экан, сен ҳеч қачон болаларни ололмайсан, судянинг ҳам оғзини мойлаб қӯйганман” деган гаплари рост бӯлганлигига ишондим. Суд биносига қайта-қайта боришимга тӯғри келди. Чекка бир қишлоқдан келганлигим учун кимдан маслаҳат олишни ҳам билмас эдим. Югур-югурларим натижасида баъзан егуликсиз ҳам қолиб кетар эдим. Бир куни суд биносидан чиқиб беҳол бир ҳолатда ӯтириб қолдим. Шунда олдимга оддийгина бир аёл келди. “Сизни боядан бери кузатиб турибман. Бошингизда бирор ташвишингиз борми?” - деб сӯраб қолди. Кӯнглим тӯлиб турганлиги учун йиғлаб, бӯлиб ӯтган воқеани ипидан-игнасигача айтиб бердим. “Эҳа, ҳали сиз ҳақ бӯлган ҳолингизда булар сизни шунча сарсон қилдими? Юринг, мени ӯша одамнинг олдига олиб боринг-чи”, - деди у аёл. Олиб бордим. Судя унга ҳам худди менга қилган муомаласидай қӯпол муомала қилди. Шунда ҳалиги аёл ҳужжатини олиб кӯрсатган эди, судянинг ранги оқариб кетди. Билсам, у аёл Президент аппаратидан юборилган бӯлиб, шундай ноҳақликларни аниқлаш ва ҳуқуқбузарларни, ӯз нафси йӯлида қонунга қарши фаолият юритиб, одамларда мавжуд Ҳукуматга қарши нафрат уйғотаётганларни топиш ва адолатни қарор топтириш учун киши билмас оддий одми бир аёл қиёфасида юрган экан. Шундан сӯнг ҳалиги судя ишдан бӯшатилди. Адолат қарор топди. Мен она сифатида болаларимни ӯз бағримга олдим. Ӯша лаҳзаларда мен учун бундан буюк бахт йӯқ эди. У аёл менга ӯзининг телефон рақамини бериб, шунга ӯхшаш ҳолатлар яна такрорланса, тортинмасдан бемалол телефон қилишим мумкинлигини, Президентимиз ҳамиша қонун ва ҳуқуқ тарафдори эканликларини таъкидлади. Ишонаманки, ӯша аёл каби давлат иши учун, инсонлар ҳуқуқи учун курашувчи кадрлар давлатимизда жуда кӯп. Шундай кадрларни тайёрлаганлиги, халқ орасига жӯнатганлиги учун Президентимизга катта раҳмат”.
О. Насруллоҳ