Вазорати маориф ва илм: 1-уми сентябр дарсҳо шурӯъ мешаванд

Бо мақсади дар сатҳи баланд баргузор намудани «Рӯзи дониш» мутобиқи банди 49-и қарори Ҳукумати Ҷумҳурии Тоҷикистон аз 01.06.2016, №237, моддаи 33 Қонуни Ҷумҳурии Тоҷикистон «Дар бораи маориф» ва банди 11-и Низомномаи Вазорати маориф ва илми Ҷумҳурии Тоҷикистон фармоиши вазири маориф ва илми Ҷумҳурии Тоҷикистон «Дар бораи тағйир додани вақти баргузории дарс» аз 26.08.2019, №5862 ба тасвиб расид.

Дар банди якуми фармоиши мазкур зикр мешавад, ки бо назардошти ба рӯзи истироҳат (якшанбе) рост омадани «Рӯзи дониш» 1-уми сентябри соли 2019 дар ҳамаи муассисаҳои таълимии ҷумҳурӣ новобаста аз шакли ташкилию ҳуқуқӣ рӯзи дарсӣ эълон гардида, 7-уми сентябри соли 2019 (шанбе) рӯзи истироҳат муқаррар карда шавад.

Тавре ки сомонаи Вазорати маориф ва илми Ҷумҳурии Тоҷикистон хабар медиҳад, тибқи ҳамин фармоиш ба сардори Сарраёсати маорифи шаҳри Душанбе, сардорони раёсатҳои маорифи Вилояти Мухтори Кӯҳистони Бадахшон, вилоятҳои Суғду Хатлон ва мудирони шуъбаҳои маорифи шаҳру ноҳияҳои тобеи марказ, директорони мактабҳои президентӣ, мактаб-интернатҳои ҷумҳуриявӣ, роҳбарони муассисаҳои таҳсилоти ибтидоӣ, миёна ва олии касбӣ дастур дода шудааст, ки иштироки хонандагону донишҷӯёнро рӯзи 1-уми сентябри соли 2019 ба дарс таъмин намоянд.

Маркази иттилоот ва таҳлил