Раёсати таълим

Телефон барои маълумот

Раёсати таълим чун ҷузъи томи сохтори донишгоҳ идораи раванди таълимро амалӣ мегардонад. Раёсати таълим вазифаҳояшро тибқи Оинномаи донишгоҳ ва Низомномаи раёсат (чун дастурҳои хизматӣ) амалӣ намуда, фаъолияти зерсохторҳои донишгоҳро ба ҳам мутобиқ месозад. Раёсати таълим бо мақсади беҳтар намудани вазъи донишандўзии донишҷўён ба таҳия ва нашри дастурҳои таълимӣ-методӣ, китобҳои дарсӣ ва бастаи маводҳои таълимӣ аз рўи низоми кредитии таҳсилот диққати махсус медиҳад. Раёсати таълим дар якҷоягӣ бо дигар сохторҳои донишгоҳ дар пешбурди раванди таълим тадбирҳои амалӣ андешида, чунин корҳоро ба анҷом мерасонад:

  • назорати ташкили чорабиниҳо оид ба баланд бардоштани раванди таълим
  • муайян намудани роҳҳои баланд бардоштани сифати таълим дар донишгоҳ
  • таҳлил ва татбиқи самараноки барномаҳои таълимӣ
  • назорат ва танзими раванди таълим дар бахши тайёрӣ
  • ташкилу назорати ҷараёни таҷрибаомўзии омўзгорӣ ва истеҳсолӣ;

Раёсати таълим ҳамасола дар оғози соли таҳсил барои факултетҳо нақшаи чорабиниҳои таълимӣ- методӣ таҳия намуда, аз рафти иҷроиши ин чорабиниҳо, риояи ҷадвали дарсӣ, рафти сессияҳои санҷишию имтиҳонӣ, иҷроиши сарбории омўзгорон, рафти иштирок ба дарсҳои ҳамдигар, ташкили дарсҳои инфиродӣ ва мустақилона, таҳияи фармонҳои аз курс ба курс гузаронӣ назорат мебарад. Дар донишгоҳ раванди таълим ва сарбории ҳайати омўзгорону профессорони донишгоҳ тибқи Дастурамал оид ба таҳияи сарбории таълимии ҳайати омўзгорони кафедраҳои муассисаҳои таҳсилоти олии касбии Ҷумҳурии Тоҷикистон ба роҳ монда шудааст.

То имрўз раёсати таълим (шуъбаи таълим)-ро Ҳоҷибоева Б.А., Шапкин А.И., Войченко А.П., Баянов А.В., Ҳакимова Э.В., Кравченко В.С., Усмонов Ғ.Ҳ., Назаров Р.Р., Раҳмонов З.П., Ўлмасов М.Ў., Азизов А.А., Ёқубов С., Ҳакимхоҷаев С. сарварӣ намудаанд. Аз моҳи марти соли 2016 вазифаи сардори раёсати таълимро дотсент Сабуров М.И. ба зимма дорад. Ҳоло раёсати таълим дар ҳайати номзади илмҳои химия, дотсент Сабуров Муҳиддин., номзади илмҳои филологӣ, дотсент Раҷабов Э, сармуаллимон Маҳмудов Исмоилҷон, Бобоҷонова Муҳайёхон, Ҳомидова Фирўзахон ва оморгарон Баротова К. ва Эргашев Ҳусейнҷон пайваста ҷиҳати пешбурди раванди таълим ва баланд бардоштани сифати таҳсилот фаъолият намуда истодааст. Раёсати таълим бо ҳайати профессорону омӯзгорони МДТ “ДДХ ба номи академик Бобоҷон Ғафуров” бо мақсади татбиқи амалии амру фармонҳо ва Паёмҳои Асосгузори сулҳу ваҳдати миллӣ –Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, фармоишҳои Вазорати маориф ва илми Ҷумҳурии Тоҷикистон, қарорҳои Хадамоти давлатии назорат дар соҳаи маориф, Шӯрои олимон ва раёсати Донишгоҳро сармашқи кори худ намуда, дар рушди раванди таълим, баланд бардоштани сатҳу сифати таълиму тадрис ва роҳандозии шаклу намудҳои навини таҳсилот, корбасти усулҳои фаъоли таълим ва истифода аз навтарин технологияҳои инноватсионӣ кӯшиш ба харҷ дода, аз василаҳои муосири таълим ва навгониҳои замонавии илм самаранок истифода менамояд. Ин самт яке аз ниҳодҳои муҳими сохтори донишгоҳ идораи раванди таълимро амалӣ намуда, вазифаҳояшро тибқи Оинномаи донишгоҳ ва Низомномаи раёсат (чун дастурҳои хизматӣ) ба роҳ монда, фаъолияти зерсохторҳои донишгоҳро ба ҳам мутобиқ месозад. Дар оғози ҳар соли таҳсил нақшаи чорабиниҳои таълимӣ - методӣ таҳия гардида, аз рафти иҷроиши ин чорабиниҳо, риояи ҷадвали дарсӣ, рафти сессияҳои санҷишию имтиҳонӣ, иҷроиши сарбории омӯзгорон, рафти иштирок ба дарсҳои ҳамдигар, ташкили дарсҳои инфиродӣ ва мустақилона, таҳияи фармонҳои аз курс ба курсгузаронӣ мавриди назорат ва баррасӣ қарор дода мешавад. Фаъолияти таълимии донишгоҳ дар 17 факултет ва 77 кафедра (аз ҷумла 5 кафедраи умумидонишгоҳӣ) ба роҳ монда шуда, аз рӯи 77 ихтисос дар шуъбаи рӯзона, 31 ихтисос дар шуъбаи таҳсилоти ғоибона ва 7 ихтисос дар шуъбаи таҳсилоти фосилавӣ нақшаҳои таълимии таҳсил фаъолият дорад. Дар донишгоҳ 30 озмоишгоҳи таълимӣ амал менамояд, ки дар таъмини тадрис ва таълими фанҳои дақиқ ва ҷомеашиносӣ заминаи мусоид фароҳам овард. Донишгоҳ дорои 41 кабинети методӣ, 73 кабинети фаннӣ, 4 синфхонаи лингофонӣ, 32 лабораторияҳои таълимӣ-илмӣ, 1 студияи телевизион, 1 студияи радио, 3 осорхона, 4 устохона ва 41 синфхонаи компутерӣ мебошад. Давомоти донишҷӯён дар шуъбаи рӯзона ба ҳисоби миёна - 97,74% ва дар шуъбаи таҳсилоти ғоибона 93%- ро ташкил медиҳад. Дар донишгоҳ 904 нафар омӯзгор, аз ҷумла 43 нафар доктори илм, профессор (6 нафар зан), 351 нафар номзади илм, дотсент, аз ҷумла 73 нафар дотсенти КОА (148 нафар зан), 193 нафар сармуаллим (123 нафар зан) ва 318 нафар муаллим (261 нафар) фаъолият менамоянд, ки 41% теъдоди умумии омӯзгоронро устодони соҳибунвон ташкил медиҳанд. Шумораи умумии донишҷӯёни донишгоҳ 20628 нафарро ташкил медиҳад, ки аз он 10236 нафар дар шуъбаи рӯзона ва 10392 нафар дар шуъбаи ғоибона таҳсил менамоянд. Аз ҷумла, тибқи квотаи Президентӣ 874 нафар таҳсил менамоянд, ки аз онҳо 515 нафарашон духтар мебошанд. Дар маҷмуъ, донишҷӯёни тибқи квота 867 нафар дар шуъбаи рӯзона ва 7 нафар дар шуъбаи ғоибона таҳсил мекунанд. Агар дар соли 2010 теъдоди умумии донишҷӯён дар шуъбаи рӯзона 8151 ададро ташкил диҳад, дар соли 2018 ин теъдод ба 10236 нафар расид, ки таваҷҷуҳи бештари довталабонро нисбат ба донишгоҳ нишон медиҳад. Чунин нишондод дар шуъбаи ғоибона (фосилавӣ)-и донишгоҳ низ назаррас мебошад. Зеро фаъолияти шуъбаи мазкур бо фарогирии довталабони ватаниву хориҷӣ ва таъмини маълумоти дуввум барои шаҳрвандони худӣ шароити мусоид фароҳам гузошт, ки бахусус, дар соли 2018 теъдоди донишҷӯёни шуъбаи ғоибона ба 10392 нафар расид, ки назар ба соли 2010 5858 нафар зиёд мебошад. Дар ин замина, мавқеи донишгоҳ ҳамчун маркази таълимӣ устувор гардида истодааст. Соли таҳсили 2018-2019 ба курси якуми донишгоҳ 3509 нафар (соли 2017-2018 - 3261 нафар) донишҷӯён дохил шуданд ( аз он ҷумла 2380 нафар духтар), ки аз онҳо 2898 нафар тариқи Маркази миллии тестии назди Президенти Ҷумҳурии Тоҷикистон, 185 нафар тариқи Квотаи президентӣ, 8 нафар тариқи Квотаи президентӣ аз ноҳияи Мурғоби ВМКБ, 2 нафар тибқи квотаи ШВКД мебошанд. Афзун ба ин, 368 нафар шаҳрванди хориҷӣ аз ҷумла 11 нафар шаҳрвандони тоҷикзабони Ҷумҳурии Қазоқистон, 23 нафар аз Ҷумҳурии Қирғизистон, 1 нафар аз Ҷумҳурии исломии Афғонистон ва 13 нафар ятими кулл мебошанд. Бояд қайд кард, ки теъдоди дохилшудагон ба донишгоҳ нисбат ба соли хониши гузашта 248 нафар зиёд мебошад. Ҳамчунин донишгоҳ дар таъмин ва тайёр намудани мутахассисони соҳаҳои мухталифи ҷомеа саҳми намоён дошта, соли ҷорӣ саҳми назарраси худро гузошт. Миқдори хатми донишҷӯён дар донишгоҳ сол то сол меафзояд, ки ин нишондод дар бартараф намудани қишри бемаълумоти ҷомеа мусоидат менамояд. Соли 2018 донишгоҳро 4546 нафар донишҷӯён аз рӯи 66 ихтисос хатм намуданд, ки нисбат ба соли гузашта ба миқдори 564 нафар зиёд мебошад. Донишгоҳ дар раванди таълим бо марказҳои илмии ватанӣ ва хориҷӣ робитаи хуби илмию таълимиро ба роҳ мондааст, ки мисоли ин гуфта робитаи хуби илмию таълимии олимон ва устодон бо Академияи илмҳои Ҷумҳурии Тоҷикистон, муассисаҳои олии кишвар ва берун аз он мебошанд. Натиҷаи хуби сифати таълими забони русӣ дар донишгоҳ боис шудааст, ки айни замон наздик 10 нафар аспиранту унвонҷӯён аз рӯйи мавзуъҳои илмҳои забоншиносӣ, типология, омӯзишу таҳқиқи хусусиятҳои забонҳои русиву англисӣ, истилоҳотшиносӣ, усули таълими забонҳои русиву тоҷикӣ зери роҳбарии устодону донишмандони донишгоҳ ва дигар муассисаҳои илмӣ машғули навиштани рисолаҳои илмӣ мебошанд. Ҷиҳати инкишоф додани нутқи донишҷӯён дар донишгоҳ усулҳои нави таълими забони русӣ ба роҳ монда шудааст. Шуруъ аз оғози соли таҳсили 2018 тибқи фармоиши ректори донишгоҳ таълими ҳамаи фанҳо, махсусан, таълими забонҳои русӣ ва англисӣ тавассути техникаҳои муосири таълимӣ ба роҳ монда шудааст, ки бешак ҷиҳати дар сатҳи баланд омӯхтани забонҳои мазкур мусоидат хоҳад кард. Лозим ба зикр аст, ки омӯзиши забони русӣ дар факултетҳои ғайритахассусӣ низ хуб ба роҳ монда шудааст. Моҳи январи соли 2018 олимпиадаи умумидонишгоҳӣ гузаронида шуд, ки дар он донишҷӯёни факултетҳои ғайритахассусӣ сатҳи баланди забондонии худро намоиш доданд. Дар донишгоҳ кабинетҳои фаннӣ ва лингофонӣ мавҷуданд, ки барои дар сатҳи баланд омӯхтани забони русӣ ва англисӣ мусоидат менамоянд. Ҷиҳати дар сатҳи баланди касбӣ ва ба талаботи ҷаҳони муосир омода кардани муаллимони забони русӣ дар кафедраҳои факултети филологияи рус семинарҳои доимоамалкунанда мавҷуданд, ки дар он омӯзгорони ҷавон бо гузоришҳои илмию амалӣ ихтисоси худ ва сатҳи забондонии худро такмил медиҳанд. Раёсати таълими донишгоҳ дар ҳамкорӣ бо садорати факултетҳо ҷиҳати саривақт ба ҷои кор ҳозиршавии мутаххасисони ҷавон низ тадбирҳои муҳим меандешад. Дар ин замина, раёсати таълим якҷоя бо аъзоёни шӯрои таълимӣ-методии факултетҳо мунтазам дар дарсҳои омӯзгорони ҷавон иштирок намуда, ҷиҳати дар сатҳи баланд гузаштани машғулиятҳои таълимӣ ва истифодаи усулҳои гуногуни дарс-лексия, дарс-муколама, дарс-суҳбат, ва ғ. маслиҳатҳои судманд медиҳанд. Машғулиятҳои таълимии магистрантон низ дар мадди назари доимӣ қарор дошта, барои дар сатҳи баланд гузаштани раванди таълими магистратура барномаҳои таълимӣ, силлабусҳои фаннӣ, КТМ ва дигар маводҳои дастурӣ тайёр карда шудааст. Устодони донишгоҳ барои дар амал татбиқ намудани барномаи такмил ва омӯзиши забонҳои англисӣ ва русӣ дар барномаи ETM MENTOR PROGRAMME ширкат варзиданд ва айни замон онҳо таҷрибаи худро байни дигар омӯзгорони факултет паҳн карда истодаанд. Дар соли 2018 зиёда аз 150 мақолаи илмӣ ва методӣ доир ба омӯзиши забони англисӣ ба нашр расидааст, ки ҷиҳати ҳарчӣ бештар фаро гирифтани забони мазкур миёни донишҷӯён мусоидат менамояд.

Мувофиқи сохтори донишгоҳ раёсати таълим аз зерсохтори зерин иборат мебошад:

  • Муовини ректор оид ба таълим
  • Раёсати таълим
  • Шуъбаи идоракунии сифати таҳсилот
  • Шуъбаи таҳсилоти фосилавӣ
  • Маркази бақайдгирӣ ва машварат
  • Маркази тестӣ
  • Шуъбаи тайёрӣ
  • Маркази технологияҳои иттилоотӣ
  • Шуъбаи таҷрибаомўзӣ ва кор бо мутахассисони ҷавон.

Номгӯи навгониҳоро дар самти таълим метавон чунин арзёбӣ намуд:

1. Таъсиси факултети филологияи ӯзбек бо кафедраҳои методикаи таълими забони ӯзбекӣ ва методикаи таълими адабиёти ӯзбек;

2.Дар заминаи кафедраи Молия, таҳлил ва омор таъсис гардидани кафедраҳои Молия ва қарз ва Иқтисодиёти ҷаҳон;

3.Дар заминаи кафедраи Археология ва этнография таъсис ёфтани кафедраҳои Таърихи Ватан ва археология ва кафедраи умумидонишгоҳии Таърихи халқи тоҷик;

4.Ҳисоби соатҳо, тасдиқнома, сарбории таълимии устодон дар соли нави таҳсил аз рӯи системаи иттилоотии донишгоҳ ба роҳ монда шуд;

5.Барномаи электронии тақсимоти сарборӣ аз нав таҳия карда шуд;

6.Таҳияи нақшаи таълимӣ ва нақшаи кории таълимӣ;

7.Сохтани барномаи дохилкунии ҷадвали дарсӣ;

8. Сохтани барнома барои қабули шаҳрвандони хориҷӣ;

9.Ташкили раванди триместр дар системаи иттилоот;

10.Пайвасти факултети таҳсилоти ғоибона дар ноҳияи Ҷаббор Расулов ба шабакаи ягонаи донишгоҳ бо воситаи хати алоқаи оптикӣ;

11. Баҳисобгирии автоматии соатҳо дар системаи иттилоотӣ;

12.Ворид намудани суратҷаласаҳои кафедраҳо ва шӯрои олимони факултетҳо ба системаи иттилоотӣ;

13.Таъсиси маркази машварати психологӣ ва рушди қобилиятҳои маърифатии “Заковат” дар назди кафедраи психологияи иҷтимоӣ ва касбии факултети педагогӣ;

14.Баргузор намудани Конфронси ҷумҳуриявии таълимӣ-методии “Масъалаҳои мубрами таълим дар замони муосир”;

15.Таъсиси 10 ихтисоси нав барои соли нави хониш;

16. Таъсиси лабораторияи “Рушди барвақти кӯдак” дар назди факултети педагогӣ;

17.Таъсиси маҷаллаи таълимӣ-методии “Раҳнамои омӯзгор”;

18.Дар заминаи кафедраи сиёсатшиносӣ ва фарҳангшиносӣ таъсис ёфтани ду кафедраи нав аз ҷумла кафедраи сиёсатшиносӣ ва кафедраи фарҳангшиносӣ ва ғайраҳо.